సంగారెడ్డి, 2026-08-06
జిల్లా న్యాయ సేవాధికార సంస్థ కార్యదర్శి బి.సౌజన్య గురువారం శిశు గృహం, జువైనల్ జస్టిస్ బోర్డు, సఖి కేంద్రాలను సందర్శించారు. జాతీయ, రాష్ట్ర న్యాయ సేవాధికార సంస్థలు, జిల్లా ప్రధాన న్యాయమూర్తి, జిల్లా న్యాయ సేవాధికార సంస్థ చైర్మన్ జి.భవానిచంద్ర ఆదేశాల మేరకు ఈ తనిఖీలు చేపట్టారు.
జిల్లా న్యాయ సేవాధికార సంస్థ కార్యదర్శి బి.సౌజన్య గురువారం శిశు గృహం, జువైనల్ జస్టిస్ బోర్డు, సఖి కేంద్రాలను సందర్శించారు. జాతీయ, రాష్ట్ర న్యాయ సేవాధికార సంస్థలు, జిల్లా ప్రధాన న్యాయమూర్తి, జిల్లా న్యాయ సేవాధికార సంస్థ చైర్మన్ జి.భవానిచంద్ర ఆదేశాల మేరకు ఈ తనిఖీలు చేపట్టారు.
ఈ సందర్భంగా బి.సౌజన్య మాట్లాడుతూ, శిశు గృహంలో పిల్లల పట్ల ప్రత్యేక శ్రద్ధ వహించి, వారి సంరక్షణకు తోడ్పడాలని సూచించారు. పిల్లలందరూ క్రమశిక్షణతో మెలగాలని, వారి బాగోగులను చూడాలని, పరిసరాలను పరిశుభ్రంగా ఉంచుకోవాలని సూచించారు. పిల్లల సంరక్షణలో అధికారులకు తగిన సూచనలు అందించారు.
సఖి కేంద్రాన్ని సందర్శించే బాధితుల సమస్యలను సత్వరమే పరిష్కరించేందుకు తగు చర్యలు తీసుకోవాలని బి.సౌజన్య సూచించారు. ముఖ్యంగా భార్యాభర్తల మధ్య తలెత్తే సమస్యలలో కౌన్సిలింగ్ నిర్వహించి, వారికి న్యాయపరమైన చిక్కుల నుండి ఎదురయ్యే ఇబ్బందులను వివరించి, సామరస్యపూర్వక పరిష్కార మార్గాలను సూచించాలని తెలిపారు.
జువైనల్ జస్టిస్ బోర్డులో బాలల హక్కుల పరిరక్షణ చట్టంపై అవగాహన కల్పించారు. తెలిసి తెలియక చేసిన నేరాల నుండి పిల్లలు బయటపడి, అలాంటి కేసులు పునరావృతం కాకుండా జాగ్రత్తలు తీసుకోవాలని సూచించారు. బాలల భవిష్యత్తును దృష్టిలో ఉంచుకొని వారికి సరైన మార్గనిర్దేశం చేయాలని తెలిపారు.
ఎవరికైనా న్యాయపరమైన విషయాలలో ఉచిత న్యాయ సహాయం అందిస్తామని బి.సౌజన్య తెలిపారు. ఏదైనా న్యాయ సహాయం అవసరమైన వారు సంగారెడ్డిలోని జిల్లా న్యాయ సేవాధికార సంస్థ కార్యాలయాన్ని సంప్రదించవచ్చని లేదా న్యాయ సేవాధికార సంస్థ టోల్ ఫ్రీ నెంబర్ 15100 కు ఫోన్ చేసి సంప్రదించవచ్చని తెలియజేశారు.
