సీజేఐపై అభ్యంతరకర పోస్టు.. అక్షరవేకువ: కేరళ కాంగ్రెస్కు సుప్రీంకోర్టు నోటీసులు

జస్టిస్ అరవింద్ కుమార్, జస్టిస్ విపుల్ ఎం. పంచోలీలతో కూడిన ధర్మాసనం ఈ మేరకు విచారణ చేపట్టింది. న కాంగ్రెస్ కేరళ విభాగానికి చెందిన అధికారిక ఎక్స్ ఖాతాలో సీజేఐ సూర్యకాంత్ను ఉద్దేశించి ఒక పోస్టు ప్రచురితమైంది. దేశంలో శాంతిభద్రతలు మీ పరిధిలో లేకపోతే రాజీనామా చేయాలని, ఆ బాధ్యతలు నిర్వహించగల మరో వ్యక్తిని తాము ఎంపిక చేసుకుంటామని ఆ పోస్టులో వ్యాఖ్యానించారు.

ఇండియా కూటమి నేతలు ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ చేపట్టిన నిరసనల నేపథ్యంలో ఈ వివాదం తలెత్తింది. సీజేఐ తమను కలవడానికి నిరాకరించారన్న అంశంపై కాంగ్రెస్ వర్గాలు అసంతృప్తి వ్యక్తం చేసినట్లు వార్తలు వచ్చాయి. ఈ పోస్టుపై తీవ్ర విమర్శలు రావడంతో కేరళ కాంగ్రెస్ దాన్ని తొలగించింది.

కాంగ్రెస్ క్షమాపణ

ఈ వ్యవహారంపై కేరళ కాంగ్రెస్ అధ్యక్షుడు సన్నీ జోసెఫ్ గతంలోనే సీజేఐకి బేషరతుగా క్షమాపణలు తెలిపారు. పార్టీ నాయకత్వానికి తెలియకుండా, అనుమతి లేకుండా మీడియా విభాగానికి చెందిన వ్యక్తి ఈ పోస్టును ప్రచురించారని వివరించారు. పోస్టు ప్రచురణకు బాధ్యుడైన వ్యక్తిని పదవి నుంచి తొలగించినట్లు వెల్లడించారు. అధికారిక పార్టీ ఖాతాలో ఇలాంటి వ్యాఖ్యలు రావడం తగదని, ఆ వ్యాఖ్యలు పార్టీ విధానాన్ని లేదా నాయకత్వ అభిప్రాయాన్ని ప్రతిబింబించవని స్పష్టం చేశారు.

సుప్రీంకోర్టు కీలక వ్యాఖ్యలు

విచారణ సందర్భంగా కాంగ్రెస్ తరఫు న్యాయవాది కోర్టుకు బేషరతు క్షమాపణలు సమర్పించారు. దీనిపై స్పందించిన ధర్మాసనం.. క్షమాపణ నిజంగా హృదయపూర్వకంగా వచ్చిందా లేదా అన్నది పరిశీలిస్తామని వ్యాఖ్యానించింది. రాజ్యాంగమే అత్యున్నతమని, ఏ వ్యక్తి లేదా రాజకీయ సంస్థ దాని కంటే గొప్పది కాదని ధర్మాసనం స్పష్టం చేసింది. న్యాయస్థానాల తీర్పులను విమర్శించే హక్కు ప్రతి ఒక్కరికీ ఉన్నప్పటికీ, భావప్రకటనా స్వేచ్ఛ పేరుతో న్యాయవ్యవస్థను బెదిరించడం లేదా న్యాయపాలనకు ఆటంకం కలిగించడం సమర్థనీయం కాదని పేర్కొంది.

న్యాయవ్యవస్థ స్వతంత్రత అనేది రాజకీయ సౌలభ్యానికి సంబంధించిన అంశం కాదని, అది రాజ్యాంగం కల్పించిన హామీ అని వ్యాఖ్యానించింది. న్యాయస్థానాల అధికారాన్ని దెబ్బతీసే ప్రయత్నాలను తీవ్రంగా పరిగణించాల్సి ఉంటుందని తెలిపింది.

కోర్టు ధిక్కరణ చట్టం కింద విచారణ

ఈ వ్యవహారంలో రాజ్యాంగంలోని ఆర్టికల్ 129 ప్రకారం సుప్రీంకోర్టుకు ఉన్న కోర్టు ధిక్కరణ అధికారాలను ఉపయోగించాల్సిన అవసరం ఉందా అనే అంశాన్ని పరిశీలించనున్నట్లు ధర్మాసనం తెలిపింది. కోర్టు ధిక్కరణ చట్టం-1971 కింద క్రిమినల్ లేదా సివిల్ ధిక్కరణ చర్యలు తీసుకోవాలా అనే అంశంపై సహాయం అందించాలని అటార్నీ జనరల్ ఆర్. వెంకటరమణిని కోరింది. అలాగే సీనియర్ న్యాయవాదుల సహాయాన్ని కూడా తీసుకోవాలని నిర్ణయించింది. ఈ దశలో కేసులోని ఆరోపణలపై తుది అభిప్రాయాన్ని వెల్లడించడం లేదని కోర్టు స్పష్టం చేసింది.