మంచిర్యాల (అక్షరవేకువ) నవంబర్ 20
మంచిర్యాల జిల్లా కేంద్రంలోని హమాలివాడలో కొన్ని వాటర్ ప్లాంట్లు ఐఎస్ఐ ప్రమాణాలను పాటించకుండానే అక్రమంగా నడుస్తున్నాయని ఆరోపణలు వస్తున్నాయి. నీటి శుద్ధి, నాణ్యత విషయంలో నిర్లక్ష్యం వహిస్తూ ప్రజల ఆరోగ్యంతో చెలగాటమాడుతున్నారని స్థానికులు ఆందోళన వ్యక్తం చేస్తున్నారు.
మంచిర్యాల జిల్లా కేంద్రంలోని టూ టౌన్ పరిధి హమాలివాడలో కొన్ని వాటర్ ప్లాంట్ల నిర్వహణ తీరుపై అనుమానాలు వ్యక్తమవుతున్నాయి. నీటి శుద్ధి, నాణ్యత ప్రమాణాలు, అవసరమైన ధ్రువీకరణలు, నిబంధనల అమలు విషయంలో నిర్లక్ష్యం జరుగుతోందనే ఆరోపణలు వినిపిస్తున్నాయి. ఐఎస్ఐ ప్రమాణాలకు సంబంధించిన అనుమతులు, నిబంధనలు పాటించకుండానే నీటి వ్యాపారం సాగిస్తున్నారనే ప్రచారం స్థానికంగా చర్చనీయాంశంగా మారింది.
ముప్పై రూపాయల పేరుతో నీటి క్యాన్ల విక్రయాలు సాగుతున్నప్పటికీ, సరఫరా చేస్తున్న నీరు నిజంగా శుద్ధి చేయబడిందా నాణ్యత పరీక్షలు నిర్వహిస్తున్నారా ప్లాంట్లలో శుభ్రత ప్రమాణాలు పాటిస్తున్నారా అన్న ప్రశ్నలు తలెత్తుతున్నాయి. క్యాన్ల శుభ్రత నుంచి నీటి శుద్ధి ప్రక్రియ వరకు నిబంధనల ప్రకారం నిర్వహిస్తున్నారా లేదా అన్నది సంబంధిత అధికారులు పరిశీలించాల్సిన అవసరం ఉంది.
ప్రజల తాగునీటి అవసరాలను వ్యాపారంగా మలుచుకుంటూ, నాణ్యత ప్రమాణాల విషయంలో నిర్లక్ష్యం వహిస్తే అది ప్రజారోగ్యానికి ముప్పుగా మారే ప్రమాదం ఉంది. అనుమతులు, నీటి నాణ్యత పరీక్ష నివేదికలు, ప్లాంట్ల నిర్వహణ ప్రమాణాలను అధికారులు తనిఖీ చేసి వాస్తవాలను వెలుగులోకి తీసుకురావాలని స్థానికులు కోరుతున్నారు.
హమాలివాడలో వాటర్ ప్లాంట్ల నిర్వహణపై సంబంధిత శాఖలు తక్షణమే తనిఖీలు చేపట్టి, నిబంధనల ఉల్లంఘనలు ఉంటే చర్యలు తీసుకోవాల్సిన అవసరం ఎంతైనా ఉందనే అభిప్రాయాలు వ్యక్తమవుతున్నాయి.



