మంచిర్యాల (అక్షరవేకువ) ఆగస్టు 08
కార్మికుల హక్కులను కాలరాస్తున్న కేంద్ర ప్రభుత్వ కార్మిక చట్టాల సంస్కరణలను, 4 లేబర్ కోడ్లను రద్దు చేయాలని, కనీస వేతన చట్టాలను కచ్చితంగా అమలు చేయాలని హింద్ మజ్దూర్ సభ (హెచ్ఎంఎస్ ఎంఎస్) మంచిర్యాల జిల్లా అధ్యక్షులు నరెడ్ల శ్రీనివాస్ డిమాండ్ చేశారు. మంచిర్యాల కార్పొరేషన్ అధ్యక్షుడిగా ఎండి హుస్సేన్ను నియమించారు.
కార్మికుల హక్కులను కాలరాస్తున్న కేంద్ర ప్రభుత్వ కార్మిక చట్టాల సంస్కరణలను, 4 లేబర్ కోడ్లను రద్దు చేయాలని, కనీస వేతన చట్టాలను కచ్చితంగా అమలు చేయాలని హింద్ మజ్దూర్ సభ (హెచ్ఎంఎస్) మంచిర్యాల జిల్లా అధ్యక్షులు నరెడ్ల శ్రీనివాస్ డిమాండ్ చేశారు. నస్పూర్ ప్రెస్ క్లబ్లో జరిగిన హెచ్ఎంఎస్ సమావేశంలో ఆయన మాట్లాడుతూ, ప్రస్తుతం కేంద్ర ప్రభుత్వం 44 కార్మిక చట్టాలను 4 లేబర్ కోడ్లుగా మార్చి కార్పొరేట్ సంస్థలకు అనుకూలంగా వ్యవహరిస్తోందని విమర్శించారు. కాంట్రాక్ట్, ఔట్సోర్సింగ్ పేరుతో కార్మికులను దోపిడీ చేస్తూ తక్కువ వేతనాలు చెల్లిస్తున్నారని, పీఎఫ్, ఈఎస్ఐ వంటి ప్రాథమిక హక్కులు కూడా అమలు కావడం లేదని ఆవేదన వ్యక్తం చేశారు.
అసంఘటిత రంగ కార్మికుల సమస్యలు
అంగన్వాడీ, ఏఎన్ఎం, ఆశా వర్కర్లు, ఆర్టీసీ, మధ్యాహ్న భోజన పథకం సిబ్బంది, 108, 104 ఉద్యోగులు, ప్రైవేట్ హాస్పిటల్ కార్మికులు, హమాలీలు, భవన నిర్మాణ కార్మికులు, గ్రామపంచాయతీ కార్మికులు, లారీ డ్రైవర్లు, ఆటో డ్రైవర్లు, పెయింటింగ్, మార్బుల్, ఎలక్ట్రిషన్, ప్లంబర్, సెంట్రింగ్ తదితర రంగాల్లో పనిచేస్తున్న కార్మికులు ఉపాధి సమస్యలు, తక్కువ వేతనాలతో తీవ్ర ఇబ్బందులు ఎదుర్కొంటున్నారని నరెడ్ల శ్రీనివాస్ వివరించారు. అసంఘటిత రంగ కార్మికులకు సమగ్ర చట్టాలు చేయడంలో పాలకులు విఫలమయ్యారని ఆయన అన్నారు.
ప్రధాన డిమాండ్లు
కాంట్రాక్ట్, ఔట్సోర్సింగ్ కార్మికులను పర్మినెంట్ చేయాలని, కనీస వేతన చట్టాలను కచ్చితంగా అమలు చేయాలని, కార్మిక వ్యతిరేక 4 లేబర్ కోడ్లను రద్దు చేయాలని ఆయన డిమాండ్ చేశారు. ఈ డిమాండ్ల సాధన కోసం హెచ్ఎంఎస్ నిరంతరం పోరాటం చేస్తూ కార్మికులకు అండగా నిలుస్తుందని స్పష్టం చేశారు.
కొత్త కార్పొరేషన్ అధ్యక్షుడి నియామకం
ఈ సందర్భంగా, ఎండి హుస్సేన్ను హింద్ మజ్దూర్ సభ (హెచ్ఎంఎస్) మంచిర్యాల కార్పొరేషన్ అధ్యక్షులుగా నియమిస్తూ, హెచ్ఎంఎస్ మంచిర్యాల జిల్లా అధ్యక్షులు నరెడ్ల శ్రీనివాస్ నియామక పత్రాన్ని అందజేశారు. ఎండి హుస్సేన్ నాయకత్వంలో మంచిర్యాల కార్పొరేషన్ పరిధిలో హెచ్ఎంఎస్ను మరింత బలోపేతం చేయడంతో పాటు అసంఘటిత రంగ కార్మికులను పెద్దఎత్తున సంఘటితం చేస్తామని ఆయన తెలిపారు.
సంఘ విస్తరణ ప్రణాళిక
షాపింగ్ మాల్స్, హోటళ్లు, బార్ అండ్ రెస్టారెంట్లు, ప్రైవేట్ ఆసుపత్రులు, సెక్యూరిటీ గార్డులు, కాంట్రాక్ట్, ఔట్సోర్సింగ్ ఉద్యోగులు, భవన నిర్మాణ కార్మికులు, అడ్డా కార్మికులు తదితర రంగాల్లో కమిటీలను ఏర్పాటు చేసి సభ్యత్వాన్ని విస్తరించనున్నట్లు ఆయన పేర్కొన్నారు.
