తెలంగాణలో కాంగ్రెస్ పార్టీ ఎన్నికల ప్రచారంలో మంచిర్యాల ఎమ్మెల్యే ప్రేమ్ సాగర్ రావు కీలక పాత్ర పోషించారు. ఆయన నేతృత్వంలో మంచిర్యాల, కొమురం భీం ఆసిఫాబాద్ జిల్లాల్లో నిర్వహించిన నాలుగు బహిరంగ సభలు విజయవంతమయ్యాయి. ఈ నేపథ్యంలో, పార్టీ అధిష్టానం ఆయన పనితీరును ప్రశంసించినట్లు తెలుస్తోంది.
ఎన్నికల ప్రచారంలో భాగంగా మంచిర్యాల, కొమురం భీం ఆసిఫాబాద్ జిల్లాల్లో ఎమ్మెల్యే ప్రేమ్ సాగర్ రావు చొరవతో నాలుగు భారీ బహిరంగ సభలు నిర్వహించారు. ఈ సభలకు ప్రజల నుంచి విశేష స్పందన లభించింది. ప్రేమ్ సాగర్ రావు తన నాయకత్వ పటిష్టతతో జన సమీకరణ చేయడంలో సఫలీకృతులయ్యారని పార్టీ వర్గాలు తెలిపాయి.
ప్రేమ్ సాగర్ రావు పనితీరును ముఖ్యమంత్రి రేవంత్ రెడ్డి, డిప్యూటీ సీఎం బట్టి విక్రమార్కలు అభినందించినట్లు సమాచారం. ఆయన పార్టీ అధిష్టానం దృష్టిలో మంచి ఇమేజ్ను సంపాదించుకున్నారని, ఇది భవిష్యత్తులో ఆయనకు రాజకీయంగా కలిసివస్తుందని భావిస్తున్నారు.
గతంలో వై.ఎస్. రాజశేఖర రెడ్డి, కిరణ్ కుమార్ రెడ్డి హయాంలో రాజకీయాల్లో క్రియాశీలకంగా ఉన్న ప్రేమ్ సాగర్ రావు, ఇటీవల డిప్యూటీ సీఎం బట్టి విక్రమార్క పాదయాత్రకు కూడా గణనీయమైన స్పందన తెచ్చారు. కాంగ్రెస్ పట్ల ఆయనకున్న అచంచలమైన అభిమానం, నాయకత్వ లక్షణాలు ఈ జిల్లాల్లో పార్టీని బలోపేతం చేస్తున్నాయని పలువురు నాయకులు పేర్కొన్నారు.
మంచిర్యాలలోని కాలేజీ గ్రౌండ్లో జరిగిన జాతీయ అధ్యక్షుడు మల్లికార్జున్ ఖర్గే సభ విజయవంతం కావడంలో కూడా ఎమ్మెల్యే ప్రేమ్ సాగర్ రావు కృషి ఉందని, గెలుపు సంకేతాలను ఆయన ముందే గుర్తించారని పార్టీ వర్గాలు తెలిపాయి. ఈ రెండు జిల్లాలను సమర్థవంతంగా నడిపించగల సత్తా ఆయనకు ఉందని వారు విశ్వసిస్తున్నారు. కాగజ్నగర్ ఎక్స్ రోడ్ వద్ద జరిగిన మరో సభ కూడా విజయవంతమైంది. ముఖ్యమంత్రి రేవంత్ రెడ్డి, ప్రేమ్ సాగర్ రావు నివాసానికి వచ్చి ఆయనతో కలిసి విందు స్వీకరించారు. ఈ పరిణామాల నేపథ్యంలో, ప్రేమ్ సాగర్ రావు మంత్రి పదవిని ఆశిస్తున్నట్లు రాజకీయ వర్గాల్లో ఊహాగానాలు వినిపిస్తున్నాయి.
