అక్షరవేకువ: మంగళవారం ఒంగోలుకు వైఎస్ జగన్.. కాకుమాను రాజశేఖర్ కుటుంబానికి పరామర్శ

కాకుమాను రాజశేఖర్ ఇటీవల హైదరాబాద్లోని తన నివాసంలో గుండెపోటుతో ఆకస్మికంగా మృతి చెందారు. ఆయన మరణంపై వైఎస్ జగన్ తీవ్ర దిగ్భ్రాంతి వ్యక్తం చేసి, పార్టీకి రాజశేఖర్ చేసిన సేవలను గుర్తుచేసుకున్నారు. రాజశేఖర్ కుటుంబ సభ్యులకు తన ప్రగాఢ సానుభూతిని తెలియజేశారు.

రాజశేఖర్ మరణానంతరం ఒంగోలులోని ఆయన కుటుంబాన్ని వైఎస్సార్సీపీకి చెందిన పలువురు ముఖ్య నాయకులు ఇప్పటికే పరామర్శించారు. పార్టీ నేతలు ఆయన భౌతికకాయానికి నివాళులర్పించి, కుటుంబ సభ్యులకు సానుభూతి తెలిపారు. పార్టీ కోసం రాజశేఖర్ అంకితభావంతో పనిచేశారని వారు పేర్కొన్నారు.

రాజశేఖర్ కుటుంబానికి తాను అండగా ఉంటానని వైఎస్ జగన్ ఇప్పటికే ఫోన్ ద్వారా ఆయన సతీమణి షర్మిలమ్మతో మాట్లాడి భరోసా ఇచ్చారు. మేమున్నాం.. ధైర్యంగా ఉండమ్మా.. పార్టీ అన్ని రకాలుగా అండగా ఉంటుంది అని ఆమెకు ధైర్యం చెప్పినట్లు వైఎస్సార్సీపీ వెల్లడించింది. త్వరలోనే ఒంగోలు వచ్చి కుటుంబ సభ్యులను స్వయంగా కలుస్తానని జగన్ హామీ ఇచ్చారు.

వైఎస్సార్సీపీ ప్రచార విభాగం రాష్ట్ర అధ్యక్షుడిగా పనిచేసిన రాజశేఖర్ పార్టీ కార్యక్రమాల్లో చురుగ్గా పాల్గొనేవారని పార్టీ నేతలు తెలిపారు. గతంలో లిడ్క్యాప్ చైర్మన్గా కూడా ఆయన బాధ్యతలు నిర్వహించారు. పార్టీకి ఆయన చేసిన సేవలను వైఎస్సార్సీపీ నేతలు స్మరించుకున్నారు.

మంగళవారం ఒంగోలు పర్యటనలో భాగంగా వైఎస్ జగన్ కాకుమాను రాజశేఖర్ కుటుంబ సభ్యులను కలిసి పరామర్శించడంతో పాటు, వారి పరిస్థితులను అడిగి తెలుసుకుని ధైర్యం చెప్పనున్నారు. జగన్ పర్యటన నేపథ్యంలో జిల్లా వైఎస్సార్సీపీ శ్రేణులు ఏర్పాట్లను పరిశీలిస్తున్నట్లు సమాచారం.