హాజీపూర్ లో స్థలాల కేటాయింపుపై సర్పంచుల ఆగ్రహం

హాజీపూర్ మండలంలోని పలు గ్రామాల్లో నిర్మించనున్న గ్రామైక్య సంఘాలకు భవనాల నిర్మాణానికి అవసరమైన భూములను కేటాయించడంలో రెవెన్యూ అధికారులు నిర్లక్ష్యం వహిస్తున్నారని పలువురు సర్పంచులు ఆగ్రహం వ్యక్తం చేశారు. సోమవారం హాజీపూర్ మండల పరిషత్తు కార్యాలయంలో సర్పంచులు సమావేశమయ్యారు. సర్పంచులు కొట్టే భూమన్న, శ్రీలతలు మాట్లాడుతూ హాజీపూర్, కర్ణమామిడి గ్రామాల్లో గ్రామైక్య సంఘాల భవనాలకు అనువైన స్థలాలను ఎంపిక చేయడంలో ఎందుకు నిర్లక్ష్యం వహిస్తున్నారో చెప్పాలని డిమాండ్ చేశారు. ఈ జాప్యంపై వారు తీవ్ర అసంతృప్తి వ్యక్తం చేశారు. తాసిల్దార్ పుష్పలత స్పందిస్తూ, సమయాభావంతో కొన్ని గ్రామాల్లో స్థలాల ఎంపిక ప్రక్రియ పూర్తి కాలేదని తెలిపారు. మరో రెండు రోజుల్లో స్థలాలు కేటాయించేలా చర్యలు తీసుకుంటామని ఆమె హామీ ఇచ్చారు. ఈ హామీతో సర్పంచులు కొంతవరకు సంతృప్తి వ్యక్తం చేశారు. అంతకుముందు జరిగిన సమావేశంలో వివిధ శాఖల అధికారులు తమ తమ ప్రగతి నివేదికలను చదివి వినిపించారు. రాబోయే అభివృద్ధి పనులపై చర్చించారు. ఈ కార్యక్రమంలో ఎంపీడీవో సాయి వెంకట రెడ్డి, ఎంపీవో సుమన్, ఏపివో మల్లయ్యతో పాటు పలువురు అధికారులు, సిబ్బంది పాల్గొన్నారు.