మంచిర్యాల జిల్లా: ఆరోగ్య కేంద్రాల్లో మెరుగైన సేవలు అందించాలి - జిల్లా వైద్య అధికారి

జైపూర్ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేసిన జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్, వైద్యాధికారికి, వైద్య సిబ్బందికి పలు సూచనలు చేశారు. ప్రతి ప్రాథమిక ఆరోగ్య కేంద్రంలో వైద్యులు, సిబ్బంది సమయానికి అందుబాటులో ఉండాలని, రోగులకు సకాలంలో వైద్యం అందించాలని ఆదేశించారు.

ఆసుపత్రిలో ప్రసవాల సంఖ్యను పెంచేందుకు అవసరమైన సౌకర్యాలను మెరుగుపరచాలని, అత్యవసర మందుల నిల్వలను ఎప్పటికప్పుడు పరిశీలించి, కొరత లేకుండా చూసుకోవాలని సూచించారు. అసంక్రమణ వ్యాధుల నమోదు ప్రక్రియను పటిష్టంగా నిర్వహించాలని, పోర్టల్‌లో వివరాలను సకాలంలో నమోదు చేయాలని ఆదేశించారు.

వాతావరణ మార్పుల నేపథ్యంలో కీటక జనిత వ్యాధుల నివారణకు ప్రత్యేక చర్యలు తీసుకోవాలని, దోమల ద్వారా వ్యాపించే మలేరియా, డెంగ్యూ వంటి వ్యాధులు ప్రబలకుండా జాగ్రత్తలు వహించాలని సూచించారు. వ్యాధి నిర్ధారణ కోసం రాపిడ్ డయాగ్నస్టిక్ కిట్లను అందుబాటులో ఉంచాలని, అత్యవసర మందులు, పాముకాటు, తేలుకాటు, కుక్కకాటు వ్యాక్సిన్‌లను సిద్ధంగా ఉంచాలని ఆదేశించారు.

మాతా శిశు సంరక్షణలో భాగంగా గర్భిణుల నమోదు వివరాలను, ఐ-రిస్క్ గర్భిణుల పర్యవేక్షణను నిశితంగా చేపట్టాలని వైద్యాధికారులకు సూచించారు. ఫార్మసిస్టులు తమ విధులను సక్రమంగా నిర్వర్తించాలని, ఔషధాల నిల్వలు, స్టాక్ రిజిస్టర్లను సరిగ్గా నిర్వహించాలని ఆదేశించారు. అన్ని గ్రామాల్లో ఓఆర్ఎస్ ప్యాకెట్లు అందుబాటులో ఉంచాలని, స్థానిక ప్రజా ప్రతినిధులు, కార్యకర్తలతో సమన్వయం చేసుకుని ఆరోగ్య కార్యక్రమాలను నిర్వహించాలని సూచించారు. మండల కమిటీలు సమర్థవంతంగా పనిచేయాలని, రాపిడ్ రెస్పాన్స్ టీమ్స్ ఏర్పాటు చేయాలని, విధుల్లో నిర్లక్ష్యం వహించే వారిపై కఠిన చర్యలు తీసుకుంటామని హెచ్చరించారు.