బ్రిటన్కు చెందిన ప్రముఖ హాస్యనటుడు, నటుడు రస్సెల్ బ్రాండ్ అత్యాచారం, లైంగిక వేధింపుల ఆరోపణల కేసులో దోషిగా తేలారు. లండన్లోని సౌత్వార్క్ క్రౌన్ కోర్టులో నాలుగు వారాల పాటు జరిగిన విచారణలో, జ్యూరీ ఒక అత్యాచారం, మూడు లైంగిక వేధింపుల ఆరోపణలను నిర్ధారించింది. మరో రెండు అత్యాచార ఆరోపణలు, ఒక లైంగిక దాడి ప్రయత్నం కేసులో అతడిని నిర్దోషిగా ప్రకటించారు.
2004 నుంచి 2009 మధ్య కాలంలో నలుగురు మహిళలపై ఈ నేరాలు జరిగినట్లు విచారణలో వెల్లడైంది. తీర్పు అనంతరం న్యాయమూర్తి జోయెల్ బెన్నథన్, రస్సెల్ బ్రాండ్కు గణనీయమైన జైలు శిక్ష పడే అవకాశం ఉందని పేర్కొంటూ బెయిల్ నిరాకరించారు. దీంతో అతడిని అదుపులోకి తీసుకుని జైలుకు తరలించారు. త్వరలో శిక్ష ఖరారు చేయనున్నారు. అత్యాచారం కేసులో జీవిత ఖైదు విధించే అవకాశం ఉండగా, శిక్ష తీవ్రతను బట్టి కోర్టు నిర్ణయం తీసుకోనుంది. ఇదిలా ఉండగా, మరో ఇద్దరు మహిళలు చేసిన అత్యాచార ఆరోపణలపై కూడా బ్రిటన్ పోలీసులు దర్యాప్తు కొనసాగిస్తున్నారు.
