కార్మికుల వేతనాల పెంపులో జనక్ ప్రసాద్ కృషికి ఐఎన్టీయూసీ నాయకుల ప్రశంస

మందమర్రి ప్రెస్ క్లబ్‌లో ఏర్పాటు చేసిన విలేకరుల సమావేశంలో ఐఎన్టీయూసీ నాయకులు మాట్లాడుతూ, జనక్ ప్రసాద్ రాష్ట్ర ఉప ముఖ్యమంత్రి మల్లు భట్టి విక్రమార్క, మంత్రి దుద్దిళ్ల శ్రీధర్ బాబులను పలుమార్లు కలిసి కార్మికుల సమస్యలు, వారి ఆర్థిక ఇబ్బందులను వివరించారని తెలిపారు.

కార్మికుల కష్టాలను ప్రభుత్వానికి నిరంతరం వివరించడం వల్ల, రాష్ట్రంలోని సుమారు కోటి 13 లక్షల మంది కార్మికులను సెమీ స్కిల్డ్, హై స్కిల్డ్, నాన్ స్కిల్డ్, స్కిల్డ్ అనే నాలుగు విభాగాలుగా వర్గీకరించి వేతనాలు పెంచే నిర్ణయం తీసుకున్నట్లు పేర్కొన్నారు.

ప్రస్తుతం రూ.12,000 వేతనం పొందుతున్న వారికి రూ.16,000 వరకు, రూ.15,000 వేతనం పొందుతున్న వారికి రూ.20,000 వరకు వేతనాలు పెరిగేలా ప్రభుత్వం చర్యలు చేపట్టిందని, ఈ పెంపులో జనక్ ప్రసాద్ చేసిన కృషి అభినందనీయమని నాయకులు కొనియాడారు.

కార్మికుల సంక్షేమం కోసం ఐఎన్టీయూసీ నిరంతరం పోరాటం కొనసాగిస్తుందని వారు తెలిపారు. ఈ కార్యక్రమంలో రాపర్తి శ్రీనివాస్, సదయ్య, తిరుపతి, కృష్ణమోహన్, రాజేందర్, రాజ్ కుమార్, వంశీ, హరీష్, దిలీప్ తదితరులు పాల్గొన్నారు.