మంచిర్యాల జిల్లా జన్నారం మండలంలో పర్యావరణ పరిరక్షణ సమితి ఆధ్వర్యంలో ప్లాస్టిక్ నిషేధం, కోతులు, కుక్కల వల్ల కలిగే ప్రమాదాలు, వాటి నియంత్రణపై అవగాహన సదస్సు నిర్వహించారు. ఈ సమావేశంలో పర్యావరణ పరిరక్షణ ఆవశ్యకతను, ప్లాస్టిక్ వాడకం వల్ల కలిగే దుష్పరిణామాలను వివరించారు.
జన్నారం మండలంలోని తెలంగాణ తల్లి విగ్రహం ఆవరణంలో పర్యావరణ ప్రేమికులు, స్థానిక ప్రజలు పాల్గొన్న ఈ సమావేశంలో, ప్లాస్టిక్ వాడకాన్ని పూర్తిగా నిషేధించాలని పిలుపునిచ్చారు. ప్లాస్టిక్ భూమిలో కలిసిపోవడానికి వందల సంవత్సరాలు పడుతుందని, ఇది పర్యావరణానికి తీవ్ర నష్టం కలిగిస్తుందని నిర్వాహకులు తెలిపారు.
కోతులు, కుక్కల సంతతిని నియంత్రించడం కోసం కుటుంబ నియంత్రణ, పునరావాస కేంద్రాల ఏర్పాటుపై ప్రజలకు అవగాహన కల్పించారు. వీటి వల్ల రోడ్లపై ప్రమాదాలు పెరిగి, ప్రజల భద్రతకు ముప్పు వాటిల్లుతోందని సమావేశంలో చర్చించారు. జంతువుల వల్ల జరిగే ప్రమాదాలను తగ్గించడానికి తగిన చర్యలు తీసుకోవాలని సూచించారు.
ఈ సమావేశంలో పాల్గొన్న పర్యావరణ పరిరక్షణ సమితి ప్రతినిధులు, ప్లాస్టిక్ వాడకంతో భూమి యొక్క pH విలువ తగ్గి, అనేక జీవరాశులు ప్రమాదంలో పడుతున్నాయని ఆందోళన వ్యక్తం చేశారు. భవిష్యత్ తరాలకు ఆరోగ్యకరమైన వాతావరణాన్ని అందించాల్సిన బాధ్యత మనందరిపై ఉందని పేర్కొన్నారు.
ఈ కార్యక్రమంలో చెట్పల్లి సత్యం, కర్నే అశోక్ కుమార్, బొట్ల సంజీవ్, సూర్నేని గోపాల్, రవి, మామిడి విజయ్, దుర్గం గంగాధర్, మండల అధ్యక్షులు తాళ్ల కుమారస్వామి గౌడ్, జిల్లా అధ్యక్షులు గొల్ల రాయమల్లు తదితరులు పాల్గొన్నారు. పర్యావరణ పరిరక్షణకు అందరూ కలిసికట్టుగా కృషి చేయాలని వారు పిలుపునిచ్చారు.
