మంత్రి గడ్డం వివేక్ వెంకటస్వామికి కృతజ్ఞతలు తెలిపిన లబ్ధిదారులు

భీమారం మండల కేంద్రంలోని సుంకరిపల్లికి చెందిన సెగ్యం లక్ష్మీ మోకాలి మార్పిడి శస్త్రచికిత్స నిమిత్తం, నిమ్స్ ఆసుపత్రిలో వైద్య ఖర్చుల కోసం మంత్రి గడ్డం వివేక్ వెంకటస్వామి చొరవ తీసుకున్నారు. ముఖ్యమంత్రి సహాయ నిధి (CMRF) నుండి రూ. 2,00,000/- ఎల్వోసీని మంజూరు చేయించడం ద్వారా ఆమెకు అండగా నిలిచారు.

సెగ్యం లక్ష్మీ కుటుంబ సభ్యులు, ఆమె కూతురు దుర్గం రజిత, కుమారుడు సెగ్యం అభినవ్ తేజలు మంత్రి వివేక్ వెంకటస్వామికి పాలాభిషేకం చేసి తమ కృతజ్ఞతలు తెలిపారు. రజిత మాట్లాడుతూ, తమ తల్లి వైద్యం కోసం మంత్రి సుమారు రూ. 6 లక్షల వరకు ఎల్వోసీ మంజూరు చేయించినందుకు ధన్యవాదాలు తెలిపారు.

ఈ సందర్భంగా కాంగ్రెస్ పార్టీ మండల నాయకులు కొక్కుల నరేష్ మాట్లాడుతూ, నిరుపేదలకు వైద్య సహాయం అందించడంలో మంత్రి వివేక్ చేస్తున్న కృషిని కొనియాడారు. నిమ్స్ ఆసుపత్రి ద్వారా జరుగుతున్న ఆపరేషన్లు ఎంతో మందికి ఊరటనిస్తున్నాయని, ఆపద సమయంలో ఈ సదుపాయాన్ని సద్వినియోగం చేసుకోవాలని ప్రజలకు సూచించారు. మండలంలో ప్రాథమిక ఆరోగ్య కేంద్రం, 108 అంబులెన్స్ వంటి సౌకర్యాలు అందుబాటులోకి తీసుకురావడంలోనూ మంత్రి సహకారం ఉందని గుర్తు చేశారు.

మంత్రి వివేక్ వెంకటస్వామి సహకారంతో నియోజకవర్గ ప్రజలు సంతోషంగా ఉన్నారని, ఆయన అందించిన సహాయం ఎంతో మందికి ఆదర్శమని పలువురు అభిప్రాయపడ్డారు. ఈ కార్యక్రమంలో స్థానికులు, యువకులు పాల్గొన్నారు.