సంగారెడ్డి, 2026-08-29
జాతీయ క్రీడా దినోత్సవాన్ని పురస్కరించుకొని సంగారెడ్డి అంబేద్కర్ స్టేడియంలో హాకీ దిగ్గజం మేజర్ ధ్యాన్చంద్ జయంతి వేడుకలు ఘనంగా జరిగాయి. ఈ కార్యక్రమంలో పాల్గొన్న అడిషనల్ కలెక్టర్ పాండు, క్రీడలు విద్యార్థుల మానసిక, శారీరక ఆరోగ్యానికి ఎంతో కీలకమని అన్నారు.
జాతీయ క్రీడా దినోత్సవాన్ని పురస్కరించుకొని సంగారెడ్డి అంబేద్కర్ స్టేడియంలో హాకీ దిగ్గజం మేజర్ ధ్యాన్చంద్ జయంతి వేడుకలను ఘనంగా నిర్వహించారు. ఈ కార్యక్రమానికి ముఖ్య అతిథిగా అడిషనల్ కలెక్టర్ పాండు హాజరయ్యారు. ఈ సందర్భంగా ఆయన మాట్లాడుతూ క్రీడలు విద్యార్థులకు కేవలం వినోదం మాత్రమే కాదని, మానసిక ఆరోగ్యం, ఉల్లాసం, ఆహ్లాదంతో పాటు శారీరక శక్తిని పెంపొందించడంలో కీలక పాత్ర పోషిస్తాయని అన్నారు. విద్యార్థులు చదువుతో పాటు క్రీడలపైనా ఆసక్తి పెంచుకొని ప్రతిభను చాటుకోవాలని సూచించారు.
విశిష్ట అతిథిగా పాల్గొన్న నేషనల్ ప్లేయర్ మహమ్మద్ జావిద్ ఆలీ, మేజర్ ధ్యాన్చంద్ క్రీడా ప్రతిభను, హాకీ రంగంలో ఆయన భారతదేశానికి సాధించి పెట్టిన విజయాలను వివరించారు. మరో గౌరవ అతిథి, యువజన సంఘాల రాష్ట్ర అధ్యక్షుడు కూన వేణు మాట్లాడుతూ, విద్యార్థులు క్రీడల్లో రాణించి ధ్యాన్చంద్ స్ఫూర్తితో దేశానికి పేరు ప్రఖ్యాతలు తీసుకురావాలని ఆకాంక్షించారు.
ఈ సందర్భంగా ఖేలో ఇండియాలో జాతీయ స్థాయిలో పతకాలు సాధించిన కొర్ర రాజు, జాడో చరణ్, కె. గీతలను ఘనంగా సన్మానించారు. ఈ కార్యక్రమంలో సీనియర్ హాకీ కోచ్ సాయికుమార్, సహాయ సాంఘిక సంక్షేమ అధికారి బి. శంకర్, రెజ్లింగ్ కోచ్ జైపాల్, వ్యాయామ ఉపాధ్యాయులు దుర్గ ప్రసాద్, సుభాష్ గౌడ్, రామకృష్ణ, రామ గౌడ్, కృష్ణయ్య, ఎస్ జీఎఫ్ సెక్రెటరీ శ్రీనివాస్, కరాటే అసోసియేషన్ ప్రతినిధి చవాన్ చందర్, బాక్సింగ్ అసోసియేషన్ ప్రతినిధి మహేష్, రెజ్లింగ్ అసోసియేషన్ ప్రతినిధి విట్టల్ నాయక్తో పాటు ఇతర సిబ్బంది, విద్యార్థులు పాల్గొన్నారు.
