తమిళనాడులోని నీలగిరి జిల్లాకు చెందిన శాస్త్రవేత్త డాక్టర్ అశోక్కుమార్ వీరముత్తు, టీ తోట కార్మికుల కుటుంబం నుంచి అంతర్జాతీయ గుర్తింపు పొందారు. వ్యర్థాల నిర్వహణ, ప్లాస్టిక్ కాలుష్య నియంత్రణ రంగాల్లో ఆయన చేసిన పరిశోధనలకు గాను వరుసగా నాలుగేళ్లు ప్రపంచ శాస్త్రవేత్తల జాబితాలో చోటు దక్కింది.
టీ తోటల్లో పనిచేసే కార్మికుల కుటుంబంలో జన్మించిన డాక్టర్ అశోక్కుమార్ వీరముత్తు, ప్రభుత్వ పాఠశాలల్లో విద్యాభ్యాసం చేసి, పర్యావరణ పరిరక్షణ రంగంలో పరిశోధనలు చేస్తూ అంతర్జాతీయ గుర్తింపు పొందారు. 2023 నుంచి 2026 వరకు వరుసగా నాలుగేళ్లు స్టాన్ఫోర్డ్ విశ్వవిద్యాలయ పరిశోధకులు, ఎల్సెవియర్ సంస్థ ప్రచురించే ప్రపంచ శాస్త్రవేత్తల ర్యాంకింగ్స్లో ఆయనకు చోటు లభించింది.
అశోక్కుమార్ నీలగిరి జిల్లాలోని గూడలూరు సమీపంలో ఉన్న ఉప్పట్టి గ్రామంలో పెరిగారు. ఆయన తల్లిదండ్రులు పి. వీరముత్తు, పి. రమాయి ఇద్దరూ టీ తోటల్లో కార్మికులుగా పనిచేశారు. సాధారణ కుటుంబ నేపథ్యం నుంచి వచ్చిన ఆయన ప్రభుత్వ విద్యాసంస్థల్లో చదువుకుంటూనే ఉన్నత విద్యను అభ్యసించారు.
భారతియార్ విశ్వవిద్యాలయంలో వృక్షశాస్త్రంలో డిగ్రీ, భారతిదాసన్ విశ్వవిద్యాలయంలో వృక్ష జీవసాంకేతిక శాస్త్రంలో పీజీ, పెరియార్ విశ్వవిద్యాలయంలో జీవసాంకేతిక శాస్త్రంలో ఎంఫిల్ పూర్తి చేశారు. అనంతరం చెన్నై విశ్వవిద్యాలయం నుంచి 2013లో పీహెచ్డీ పొందారు. పరిశోధన సమయంలో ఇండో-ఆస్ట్రేలియన్ ఫెలోషిప్ ద్వారా ఆస్ట్రేలియాలోని అడిలైడ్ విశ్వవిద్యాలయాన్ని సందర్శించే అవకాశం దక్కింది. తర్వాత మలేషియా, తైవాన్ తదితర దేశాల్లోనూ పరిశోధన అనుభవాన్ని సంపాదించారు.
వ్యర్థాల నుంచి విలువైన వనరులు
అశోక్కుమార్ పరిశోధనల్లో వ్యర్థాల నిర్వహణ, ప్లాస్టిక్ కాలుష్య నియంత్రణ, జీవ ఇంధనాల తయారీ, పునరుత్పాదక ఇంధనాలు ప్రధాన అంశాలుగా ఉన్నాయి. పారవేసే పదార్థాల నుంచి ఉపయోగకరమైన ఉత్పత్తులను తయారు చేయడం, జీవ పదార్థాల నుంచి ఇంధనం పొందడం, బయోచార్ ఉత్పత్తి, సూక్ష్మశైవలాల సాయంతో మురుగునీటి శుద్ధి వంటి అంశాలపై ఆయన పరిశోధనలు సాగుతున్నాయి.
సాధారణంగా చెత్తగా పరిగణించే కొన్ని పదార్థాలలోనూ తిరిగి వినియోగించుకోదగిన వనరులు ఉంటాయి. వాటిని శాస్త్రీయ పద్ధతుల్లో శుద్ధి చేసి, ఉపయోగకరమైన ఉత్పత్తులుగా మార్చగలిగితే వ్యర్థాల పరిమాణాన్ని తగ్గించడంతోపాటు వనరులను సమర్థంగా వినియోగించుకునే అవకాశం ఉంటుంది. అయితే, ఇటువంటి సాంకేతిక పరిజ్ఞానాల వల్ల పర్యావరణానికి కలిగే ప్రయోజనాలు వాటి తయారీ విధానం, శక్తి వినియోగం, ప్రాసెసింగ్ పద్ధతులపై ఆధారపబడి ఉంటాయి.
అంతర్జాతీయ పరిశోధన అనుభవం
అశోక్కుమార్ ఆస్ట్రేలియా, మలేషియా, తైవాన్, సింగపూర్, థాయ్లాండ్ తదితర దేశాల సంస్థలతో పరిశోధన సంబంధాలు కలిగి ఉన్నారు. పారిశ్రామిక పరిశోధనలో భాగంగా ముంబైలోని రిలయన్స్ ఇండస్ట్రీస్తో కలిసి జీవ శుద్ధి కేంద్రాల సాంకేతికతలు, జీవ ఇంధనాలు, జీవ ఉత్పత్తులకు సంబంధించిన అంశాలపై పనిచేసిన అనుభవం కూడా ఆయనకు ఉంది.
పరిశోధనతో పాటు శాస్త్రీయ పత్రికలకు సంపాదకీయ, సమీక్ష బాధ్యతలు కూడా నిర్వహించారు. 2015లో మలేషియాలో జరిగిన పారిశ్రామిక కళలు, సాంకేతిక ప్రదర్శనలో కాంస్య పతకం, 2021లో చెక్ రిపబ్లిక్లో నిర్వహించిన అంతర్జాతీయ సదస్సులో ఉత్తమ ప్రజెంటర్ పురస్కారం పొందినట్లు నివేదికలు పేర్కొన్నాయి.
