Mancherial/Jaipur (అక్షరవేకువ) జూలై 10
మండల కేంద్రమైన జైపూర్లో ప్రయాణికుల కనీస సౌకర్యాలు కరువయ్యాయి. మంచిర్యాల వైపు వెళ్లే ప్రయాణికులకు పక్కా బస్టాండ్ లేకపోవడం అధికారుల నిర్లక్ష్యాన్ని సూచిస్తోంది. దాదాపు 23 గ్రామాలకు చెందిన వందలాది మంది ప్రయాణికులు రోడ్డు పక్కనే నిలబడి ఎండకు, వానకు ఇబ్బందులు పడుతున్నారు.
మండల కేంద్రమైన జైపూర్లో ప్రయాణికుల కనీస సౌకర్యాలు కరువయ్యాయి. మండలం ఏర్పడి ఇన్నేళ్లవుతున్నా, నేటికీ మంచిర్యాల వైపు వెళ్లే ప్రయాణికులకు ఒక పక్కా బస్టాండ్ దిక్కులేకపోవడం అధికారుల, ప్రజాప్రతినిధుల నిర్లక్ష్యానికి అద్దం పడుతోంది.
జైపూర్ మండలం పరిధిలో దాదాపు 23 గ్రామాలు ఉన్నాయి. ఈ గ్రామాల ప్రజలు తమ నిత్య అవసరాలు, విద్యా, వైద్యం, వ్యాపార పనుల నిమిత్తం ప్రతిరోజూ జైపూర్ మండల కేంద్రానికి వస్తుంటారు.
ప్రస్తుతం మంచిర్యాల నుండి చెన్నూర్ వెళ్లే దారిలో ఒక బస్టాండ్ నిర్మించినప్పటికీ, అది సరిగ్గా ఉపయోగంలో లేకుండా పోయింది. చెన్నూర్ నుండి మంచిర్యాల వైపు వెళ్లే రోడ్డు వైపు (ఆపోజిట్ సైడ్) కనీసం బస్టాండ్ షెల్టర్ కూడా లేదు. దీనివల్ల నిత్యం వందలాది మంది ప్రయాణికులు తీవ్ర ఎండకు ఎండవలసి, వానకు తడిసిపోతూ రోడ్డు పక్కనే గంటల తరబడి పడిగాపులు కాయాల్సి వస్తోంది. వృద్ధులు, మహిళలు, చిన్న పిల్లలు కూర్చోవడానికి కూడా స్థలం లేక అల్లాడిపోతున్నారు. గతంలో ఉన్న పాత బస్టాండ్ భవనం ప్రస్తుతం పూర్తిగా నిరుపయోగంగా మారింది. దాన్ని ఆధునీకరించడం లేదా ఆ స్థలంలో కొత్త భవనాన్ని నిర్మించడంలో అధికారులు పూర్తిగా విఫలమయ్యారనే విమర్శలు వ్యక్తమవుతున్నాయి.
మంచిర్యాల నుండి చెన్నూర్ వెళ్లే దారిలో ఏ విధంగా అయితే బస్టాండ్ నిర్మించారో, అదే విధంగా ఆపోజిట్ సైడ్లో మంచిర్యాల్ వెళ్లే ప్రయాణికులకు కూడా ఒక నూతన బస్టాండ్ను నిర్మించాలని స్థానిక ప్రజలు, ప్రయాణికులు కోరుతున్నారు. సుమారు 23 గ్రామాల ప్రజల రవాణా ఇబ్బందులను దృష్టిలో ఉంచుకుని, ఉన్నతాధికారులు, ప్రజాప్రతినిధులు, స్థానిక మంత్రి తక్షణమే స్పందించి, నిధులు మంజూరు చేసి నూతన బస్టాండ్ నిర్మాణాన్ని చేపట్టాలని మండల ప్రజలు డిమాండ్ చేస్తున్నారు.
