సంగారెడ్డి జిల్లాలో సురక్షిత బచ్పన్ అభియాన్ కార్యక్రమంలో భాగంగా, శనివారం కరుణ జిల్లా న్యాయ సేవాధికార సంస్థ ఆధ్వర్యంలో న్యాయ అవగాహన కార్యక్రమం జరిగింది. జిల్లా ప్రధాన న్యాయమూర్తి జి.భవాని చంద్ర, కార్యదర్శి బి.సౌజన్య విద్యార్థులకు బాలల హక్కులు, చట్టపరమైన రక్షణ, వ్యక్తిగత భద్రతపై అవగాహన కల్పించారు.
దేశవ్యాప్తంగా జరుగుతున్న బాలల అవగాహన కార్యక్రమంలో భాగంగా ఈ కార్యక్రమం నిర్వహించారు. ఈ సందర్భంగా జిల్లా ప్రధాన న్యాయమూర్తి జి.భవాని చంద్ర మాట్లాడుతూ, ప్రతి చిన్నారికి సురక్షితమైన బాల్యాన్ని అందించడం సమాజంలోని ప్రతి ఒక్కరి బాధ్యత అని పేర్కొన్నారు. బాలలపై జరిగే లైంగిక వేధింపులు, శారీరక, మానసిక హింస, బాల్యవివాహాలు, బాల కార్మిక వ్యవస్థ, బాలల అక్రమ రవాణా వంటి సమస్యలపై విద్యార్థులకు అవగాహన కలిగి ఉండాలని సూచించారు. పిల్లలు తమకు ఎదురయ్యే సమస్యలను భయపడకుండా తల్లిదండ్రులు, ఉపాధ్యాయులు లేదా సంబంధిత అధికారుల దృష్టికి తీసుకురావాలని తెలిపారు. జిల్లా న్యాయ సేవాధికార సంస్థ కార్యదర్శి బి.సౌజన్య మాట్లాడుతూ, బాలల రక్షణ కోసం అమలులో ఉన్న వివిధ చట్టాల గురించి వివరించారు. ముఖ్యంగా పోక్సో చట్టం ( ) ద్వారా బాలలకు లభించే చట్టపరమైన రక్షణ, బాలలపై లైంగిక నేరాలకు సంబంధించిన ఫిర్యాదుల నమోదు, బాధిత బాలలకు అందించే సహాయ సహకారాల గురించి వివరించారు. అలాగే బాలల హక్కులు, విద్యా హక్కు, సమానత్వ హక్కు, గౌరవంగా జీవించే హక్కు, సురక్షిత వాతావరణంలో పెరిగే హక్కుల గురించి విద్యార్థులకు తెలియజేశారు. ఎవరైనా అనుచితంగా ప్రవర్తించినా, అసభ్యకరంగా మాట్లాడినా, తాకినా లేదా బెదిరింపులకు పాల్పడినా వెంటనే విశ్వసనీయమైన పెద్దలకు తెలియజేయాలని సూచించారు. విద్యార్థులు తమ హక్కుల గురించి తెలుసుకోవడంతో పాటు ఇతర బాలల హక్కులను కూడా గౌరవించాలని, ఎక్కడైనా బాలలపై అన్యాయం లేదా వేధింపులు జరిగినట్లు గమనిస్తే సంబంధిత అధికారులకు సమాచారం అందించాలని సూచించారు.
