ఆన్లైన్లో మందులు, ఆరోగ్య ఉత్పత్తులు విక్రయిస్తున్నామంటూ నకిలీ వెబ్సైట్ల ద్వారా ప్రజలను మోసం చేస్తున్న ముఠా గుట్టును ఢిల్లీ పోలీసులు రట్టు చేశారు. ఈ కేసులో ఇద్దరు యువకులను అరెస్ట్ చేసి, వారి నుంచి రూ.2.66 లక్షలకు పైగా నగదును స్వాధీనం చేసుకున్నారు. పంజాబ్కు చెందిన ప్రజలను లక్ష్యంగా చేసుకుని ఈ మోసానికి పాల్పడినట్లు పోలీసులు తెలిపారు.
పోలీసుల వివరాల ప్రకారం.. పంజాబ్లోని అమృత్సర్కు చెందిన ఒక వ్యక్తి ఆన్లైన్లో ఆరోగ్య ఉత్పత్తులు, మందుల కోసం వెతుకుతుండగా ఒక నకిలీ వెబ్సైట్ కనిపించింది. అందులో ఉన్న ఉత్పత్తులను కొనుగోలు చేసేందుకు సుమారు రూ.83,257 చెల్లించాడు. అయితే డబ్బులు తీసుకున్నప్పటికీ వస్తువులు మాత్రం అతడికి చేరలేదు. దీంతో బాధితుడు పోలీసులకు ఫిర్యాదు చేశాడు. ఈ ఫిర్యాదు ఆధారంగా తూర్పు ఢిల్లీ సైబర్ పోలీస్ స్టేషన్లో కేసు నమోదు చేసి దర్యాప్తు చేపట్టారు.
దర్యాప్తులో భాగంగా పోలీసులు బ్యాంకు ఖాతాలు, ఖాతాదారుల గుర్తింపు పత్రాలు, ఆర్థిక లావాదేవీలను పరిశీలించారు. ఈ మోసానికి సంబంధించి రెండు బ్యాంకు ఖాతాల్లో మొత్తం రూ.2,66,437 ఉన్నట్లు గుర్తించారు. ఆ మొత్తాన్ని ఏటీఎంల ద్వారా నగదుగా తీసుకున్నట్లు విచారణలో వెల్లడైంది.
నిందితుడు ఆయుష్ ఆర్య తన బ్యాంకు ఖాతా వివరాలతో పాటు స్నేహితుడి ఖాతా వివరాలను కూడా తన బంధువైన హితిన్ కుమార్కు ఇచ్చినట్లు పోలీసుల విచారణలో వెల్లడైనట్లు సమాచారం. ఇందుకు ప్రతిఫలంగా మోసం ద్వారా వచ్చిన మొత్తంలో 10 శాతం కమీషన్గా తీసుకునేవాడని పోలీసులు తెలిపారు. మిగిలిన డబ్బును నగదుగా తీసి హితిన్ కుమార్కు అందించేవారని పేర్కొన్నారు. ఈ కేసులో హితిన్ కుమార్ను అరెస్ట్ చేశారు.
వెబ్సైట్ను నిర్వహిస్తూ నకిలీ విక్రయాలకు పాల్పడిన మరో వ్యక్తితో హితిన్కు సంబంధాలు ఉన్నట్లు విచారణలో వెలుగులోకి వచ్చింది. ఆ వ్యక్తి వివరాలు, ముఠాలోని ఇతర సభ్యుల పాత్రను పోలీసులు పరిశీలిస్తున్నారు. ఆయుష్కు చెందిన మొబైల్ ఫోన్ను స్వాధీనం చేసుకున్నారు. అందులో వెబ్సైట్కు సంబంధించిన సమాచారం, నిందితుల మధ్య జరిగిన వాట్సాప్ సంభాషణలు ఉన్నట్లు గుర్తించారు.
ఈ మోసంలో మరెంతమంది బాధితులుగా మారారు డబ్బు ఎక్కడికి తరలించారు అనే అంశాలపై పోలీసులు దర్యాప్తు కొనసాగిస్తున్నారు.
