భూటాన్లో హిమానీనద సరస్సు బద్దలవడంతో అసోం, పశ్చిమ బెంగాల్ రాష్ట్రాలకు వరద ముప్పు ఏర్పడింది. గాసా జిల్లాలోని షింటాఫు సరస్సు నుంచి భారీగా నీరు బయటకు ప్రవహించడంతో నదుల నీటిమట్టాలు పెరిగే ప్రమాదం ఉందని అధికారులు హెచ్చరించారు. ముఖ్యంగా నదీ పరివాహక ప్రాంతాల్లోని ప్రజలను అప్రమత్తం చేసి, సురక్షిత ప్రాంతాలకు తరలిస్తున్నారు.
భూటాన్లోని గాసా జిల్లాలో ఉన్న షింటాఫు () హిమానీనద సరస్సు నుంచి గురువారం సాయంత్రం భారీగా నీరు బయటకు ప్రవహించింది. ఈ సరస్సు భూటాన్లో ప్రమాదకరంగా గుర్తించిన 17 హిమానీనద సరస్సుల్లో ఒకటి. సరస్సు నుంచి విడుదలైన నీరు మో చు నది ద్వారా దిగువ ప్రాంతాలకు చేరుతోంది. అక్కడి నుంచి సంకోష్ నదిలోకి ప్రవహించే అవకాశం ఉండటంతో భారత అధికారులు అప్రమత్తమయ్యారు.
ఈ ఘటన కారణంగా భూటాన్లోని గాసా త్షాచు సహజ వేడి నీటి బుగ్గల వద్ద ఉన్న కొన్ని నిర్మాణాలు దెబ్బతిన్నాయి. ముందుగానే ప్రజలను ఖాళీ చేయించడంతో ఇప్పటివరకు ప్రాణనష్టం సంభవించలేదని అధికారులు వెల్లడించారు.
అసోం, బెంగాల్లో హై అలర్ట్
నీటి ప్రవాహం పెరిగే అవకాశం ఉండటంతో పశ్చిమ బెంగాల్లోని అలీపుర్దువార్, కూచ్బెహార్ ప్రాంతాలతో పాటు అసోంలోని జిల్లాలో హెచ్చరికలు జారీ చేశారు. సంకోష్ నది పరివాహక ప్రాంతాల్లో నివసించే ప్రజలను వెంటనే సురక్షిత ప్రాంతాలకు వెళ్లాలని అధికారులు సూచించారు. పశ్చిమ బెంగాల్లోని కుమార్గ్రామ్, తుఫాన్గంజ్ ప్రాంతాల్లో ప్రజలను అప్రమత్తం చేసేందుకు మైకుల ద్వారా ప్రకటనలు చేశారు. డార్జిలింగ్ కొండ ప్రాంతాలు, డువార్స్, తెరాయ్ ప్రాంతాల ప్రజలు కూడా అప్రమత్తంగా ఉండాలని సూచించారు.
వేలాది మంది తరలింపు
వరద ముప్పు నేపథ్యంలో పశ్చిమ బెంగాల్లో సహాయక చర్యలు ముమ్మరం చేశారు. అలీపుర్దువార్ జిల్లాలో సుమారు 4,000 నుంచి 5,000 మందిని సహాయక శిబిరాలకు తరలించినట్లు అధికారులు వెల్లడించారు. మరో 6,000 మందికి పైగా ప్రజలను సురక్షిత ప్రాంతాలకు పంపించారు. పశువులను కూడా ప్రజలు తమ వెంట తీసుకెళ్తున్నారు. జాతీయ విపత్తు ప్రతిస్పందన దళం (ఎన్డీఆర్ఎఫ్), రాష్ట్ర విపత్తు ప్రతిస్పందన దళం (ఎస్డీఆర్ఎఫ్) బృందాలను అప్రమత్తం చేశారు. అవసరమైన సహాయక చర్యల కోసం అధికారులు సిద్ధంగా ఉన్నారు.
74 లక్షల క్యూబిక్ మీటర్ల నీరు విడుదల
భూటాన్లోని సరస్సు నుంచి సుమారు 74 లక్షల ఘనపు మీటర్ల నీరు బయటకు వచ్చినట్లు ప్రాథమిక సమాచారం. ఈ నీరు సంకోష్ నదిలోకి చేరితే పశ్చిమ బెంగాల్, అసోం సరిహద్దు ప్రాంతాల్లో నీటిమట్టాలు వేగంగా పెరిగే ప్రమాదం ఉందని అధికారులు భావిస్తున్నారు. కేంద్ర జల సంఘం కూడా పరిస్థితిని పర్యవేక్షిస్తోంది. నీటి ప్రవాహం దిగువ ప్రాంతాలకు చేరే సమయాన్ని అంచనా వేస్తూ నదుల నీటిమట్టాలను నిరంతరం పరిశీలిస్తున్నారు. అసోం ప్రభుత్వం కూడా జిల్లా అధికారులను అప్రమత్తం చేసింది.
హిమానీనదాలు కరిగిపోవడంతో పర్వత ప్రాంతాల్లో ఏర్పడే సరస్సుల్లో భారీగా నీరు నిల్వ ఉంటుంది. సరస్సు సహజ అడ్డుకట్టలు బలహీనపడటం లేదా తెగిపోవడం వల్ల నీరు ఒక్కసారిగా దిగువకు ప్రవహిస్తుంది. దీనినే గ్లేసియల్ లేక్ అవుట్బర్స్ట్ ఫ్లడ్ (జీఎల్ఓఎఫ్) అంటారు. ఇలాంటి వరదలు వేగంగా ప్రవహించడమే కాకుండా మట్టి, రాళ్లు, చెట్ల కొమ్మలను కూడా కొట్టుకువస్తాయి. దీంతో నదీ తీర గ్రామాలు, రహదారులు, వంతెనలు, వ్యవసాయ భూములకు తీవ్ర నష్టం వాటిల్లే ప్రమాదం ఉంటుంది.
