మంచిర్యాల జిల్లాలో ప్రపంచ రక్తపోటు దినోత్సవాన్ని పురస్కరించుకొని, అర్బన్ ప్రాథమిక ఆరోగ్య కేంద్రం ఆధ్వర్యంలో ప్రజలకు రక్తపోటుపై అవగాహన కల్పించేందుకు పలు కార్యక్రమాలు నిర్వహించారు.
ప్రపంచ రక్తపోటు దినోత్సవం సందర్భంగా, మంచిర్యాల అర్బన్ ప్రాథమిక ఆరోగ్య కేంద్రం మరియు రెవెన్యూ డివిజన్ మంచిర్యాల్ ప్రజావాణి కార్యక్రమంలో ప్రజలకు రక్తపోటుపై అవగాహన కల్పించారు. ప్రోగ్రామ్ ఆఫీసర్ ఎన్.సి.డి. డాక్టర్ ప్రసాద్, వైద్యాధికారులు డాక్టర్ స్నేహిత, డాక్టర్ అశోక్ లతో కలిసి రక్తపోటుపై అవగాహన కరపత్రాలను ఆవిష్కరించారు. ప్రజావాణి కార్యక్రమంలో పాల్గొన్న అధికారులకు కూడా రక్తపోటుపై అవగాహన కల్పించారు.
రెవెన్యూ డివిజనల్ అధికారి శ్రీనివాస్, వివిధ శాఖల అధికారులు ఈ కార్యక్రమంలో పాల్గొన్నారు. రక్తపోటును 'నిశ్శబ్ద శత్రువు'గా పేర్కొంటూ, దీనిని ముందుగా గుర్తించి, జీవనశైలి మార్పుల ద్వారా అరికట్టవచ్చని అధికారులు తెలిపారు. సరైన సమయంలో, సరైన మోతాదులో మందులు వాడటం ద్వారా రక్తపోటును నియంత్రించవచ్చని సూచించారు. ప్రజలలో ఉన్న అపోహలను తొలగించేందుకు ఈ కార్యక్రమం దోహదపడింది.
ఈ కార్యక్రమంలో సి.హెచ్.ఓ.లు కాకిరాల వెంకటేశ్వర్లు, ఆర్.ఎస్. పద్మ, వసుమతి, మార్త లక్ష్మణ స్వామి, అర్బన్ ప్రాథమిక ఆరోగ్య కేంద్రం నర్సింగ్ అధికారులు, ఆరోగ్య కార్యకర్తలు పాల్గొన్నారు. జిల్లాలోని అన్ని ప్రాథమిక ఆరోగ్య కేంద్రాలు తమ పరిధిలోని గ్రామాలలో ప్రజలకు రక్తపోటుపై అవగాహన కల్పిస్తున్నాయని జిల్లా మాస్ మీడియా అధికారి బుక్క వెంకటేశ్వర్ తెలిపారు.
ప్రతి సోమవారం ప్రజావాణి కార్యక్రమంలో అధికారులకు, ప్రజలకు అవగాహన కల్పించడం ద్వారా గ్రామీణ ప్రజలలో ఈ వ్యాధిపై అవగాహన పెంచేందుకు కృషి జరుగుతుందని ఆయన పేర్కొన్నారు. ప్రభుత్వపరంగా అన్ని రకాల మందులు అందుబాటులో ఉన్నాయని, ప్రజలందరూ ఈ సౌకర్యాలను సద్వినియోగం చేసుకోవాలని కోరారు.
